• Feed RSS

Manan Nain Kompetisaun Blog

Timor-Leste Open Source Community Monday, December 17, 2018
0

Parabenz ba manan nain kompetisaun blog, naran manan nain mak hanesan tuir mai ne'e: 1. David Gomes de Arujo dg-habitek.blogspot.com
2. Quintiliano da Costa Fernandes quintidcf.blogspot.com 3. Elizito dos Santos elhymendes.blogspot.com
Kompetisaun ne'e hetan suporta masimu husi Elovia Solution, likisahost, no visimitra, telkomcel, no Timor Plaza.

read more

Kompetisaun Blog "Sharing Knowledge With TELKOMCEL"

Timor-Leste Open Source Community , , Saturday, December 8, 2018
5

Iha selebrasaun loron aniversariu Fundasaun Dezenvolvimento Software Livre (FDSL) ba dala 6 ne'ebe monu iha data 17 Dezembru 2018. FDSL serbisu hamutuk ho operadora telekomunikasaun TELKOMCEL no hetan apoiu husi kompania VISIMITRA no Timor Plaza no mos hetan suporta husi Lafaek Blogger Community (LBC) no Females Love Information Technology (FEELIT) sei realiza kompetisaun blog ho tema "Sharing Knowledge With TELKOMCEL".

Kompetisaun ne'e nudar ida husi misaun FDSL ho TELKOMCEL ne'ebe hakarak promove, habelar no haburas konteudu lokal ho lingua tetun iha mundu internet. Atividades ne'e mos nudar apresiasaun husi FDSL ba kompania TELKOMCEL mak durante ne'e sempre fo apoiu no sempre kolabora hamutuk iha atividades mak realizadu husi Fundasaun Dezenvolvimento Software Livre.

Oportunidade diak bodik-ba Blogger Timor-Leste iha ne’ebe deit, imi bele partisipa iha kompetisaun refere no hetan premiu prinsipal husi TELKOMCEL, no premiu seluk husi kompania VISIMITRA & TIMOR PLAZA.

Informasaun kona-ba rejistrasaun no regras kompetisaun bele download iha link kraik ne'e:

DOWNLOAD

read more

Maneira Restabelese Boot Loader GRUB

Eligio Moniz do Rego , , Thursday, February 9, 2017
5

GRand Unified Bootloader ou famozu ho sigla GRUB, nudar boot loader mak frekuentemente utilizadu iha sistema operasaun Linux. GRUB permiti utilizador linux bele instala variu sistema operasaun liu husi ida iha dispotivu komputador ou laptop. GRUB mos permiti utilizador para bele determina sistema operasaun ne'ebe mak hakarak utilizador hala'o. Boot loader ne'e fornesidu no dezenvolvidu husi GNU Project ho lisensia GNU GPL version 3. Versaun ikus boot loader GRUB maka GRUB2. Atualmente, maioria distro Linux hanesan Debian, Fedora, Ubuntu, Slackware, OpenSUSE, no seluktan utiliza ona GRUB2 nudar padraun boot loader. Aparensia GRUB bele modifikadu tuir nesesidades, maibe sujestaun husi Autores tenki kuidadu tamba kuandu sala modifika sintaxe GRUB bele fornese impaktu failansu booting ba sistema operasaun iha hard disk laran.

Ezemplu Menu GRUB Iha Linux Ubuntu
As vezes, utilizador konfrontadu ho kondisaun boot loader GRUB lakon ou la mosu wainhira reinstalasaun sistema operasaun Windows ba hard disk mak disponivel ona sistema operasaun Linux no Windows (Dual Boot). Ne'e sigfinika, boot loader GRUB automatikamente troka ona ho boot loader Windows. Ho nune'e, kuandu booting diretamente sei tama ba sistema operasaun Windows.

Ho kondisaun ne'ebe esplika ona iha leten, parsialmente bo'ot utilizador komputador lakohi hanoin naruk, no foti desijaun reinstalasaun fali Linux. Efetivamente disponivel maneira fasil oinsa restabelese boot loader GRUB sem presija reinstalasaun sistema operasaun Linux. Somente utiliza deit Linux Live USB ou Linux Live CD/DVD utilizador bele ona aplika maneira mak Autores esplika iha kraik ne'e.

Notas:
Maneira ne'e teste iha Linux Mint 17.3. Bele mos aplika ba distro Linux seluk hanesan Debian, Ubuntu, Fedora, Manjaro, Mageia, no seluktan maibe ho rekizitu tenki utiliza GRUB nudar boot loader default. Keta haluha mos prepara ona bootable sistema operasaun Linux ho media CD/DVD se lae USB Flashdisk. Maibe iha pratika ne'e Autores utiliza Linux Mint mak hala'o husi USB Flashdisk (Linux Live USB).

Tuir mai maneira oinsa restabelese boot loader GRUB iha Linux Mint:
  1. Boot komputador ou laptop ho Linux Live CD/DVD ou Live USB.

  2. Loke aplikasaun Terminal liu husi menu: System Tools → Terminal, bele mos utiliza kombinasaun butaun keyboard: Ctrl + Alt + T.

  3. Buka lokalizasaun husi partisaun Linux ho komandu tuir mai.
    sudo fdisk -l
    Rezultadu husi komandu iha leten mais ou menus sei mosu hanesan ezemplu ilustrasaun iha kraik ne'e:
    Disk /dev/sda: 465.8 GiB, 500107862016 bytes, 976773168 sectors
Units: sectors of 1 * 512 = 512 bytes
Sector size (logical/physical): 512 bytes / 4096 bytes
I/O size (minimum/optimal): 4096 bytes / 4096 bytes
Disk identifier: 50DC7296-0110-45FC-B7EE-EF1A3412CAB9

Device     Boot      Start        End     Blocks    Id  System
/dev/sda1    *        2048    1026047     512000     7  HPFS/NTFS/exFAT
/dev/sda2          1026048  209717247  104345600     7  HPFS/NTFS/exFAT
/dev/sda3        209717310  976768064  383525377+   82  Linux swap / Solaris
/dev/sda4        976768484  915327023  52353024     83  Linux

    Notas:
    Partisaun Linux mak eziste ona iha Autores nian hard disk maka /dev/sda4 (hare'e ezemplu ilustrasaun iha leten). Tenki lembradu katak, lokalizasaun tabela partisaun iha kada hard disk as vezes diferente.

  4. Mount partisaun Linux refere
    sudo mount /dev/sda4 /mnt
  5. Kontinua mount virtual filesystem hanesan maneira tuir mai ne'e
    sudo mount --bind /dev  /mnt/dev
sudo mount --bind /proc /mnt/proc
sudo mount --bind /sys  /mnt/sys
  6. Login nudar user root utiliza komandu chroot
    sudo chroot /mnt
  7. Depois login ba partisaun Linux, kontinua instala boot loader GRUB ho maneira iha kraik ne'e.
    grub-install /dev/sda
    Notas:
    Karik instalasaun susesu, sei mosu notifikasaun "Installation Finished. No error reported."

  8. Kontinua atualizasaun lista menu GRUB ho komandu
    update-grub
  9. Sai husi modu chroot
    exit
  10. Reboot komputador ou laptop liu husi Terminal ho maneira
    sudo reboot
    Notas:
    Keta haluha hasai ou losu bootable CD/DVD ou USB Flashdisk Linux husi dispotivu komputador ou laptop.
Karik buat hotu la'o ho diak, menu GRUB sei mosu fila-fali hanesan inisialmente.

Boa sorte!

Referensia: 
https://www.gnu.org/software/grub/
https://en.wikipedia.org/wiki/GNU_GRUB

read more

Kria Linux Live USB ho UNetbootin

Eligio Moniz do Rego , , Tuesday, February 7, 2017
4

Barak husi utilizador Linux seidauk hatene oinsa hakarak kria bootable sistema operasaun Linux utiliza USB Flashdisk nudar alternativu substitui bootable CD/DVD. Oportunidade ne'e Autores sei fornese maneira oinsa kria bootable Flashdisk utiliza aplikasaun Universal Netboot Installer (UNetbootin).

UNetbootin nudar aplikasaun open source dezenvolvidu husi Geza kovacs utilizadu para kria bootable Linux iha flahsdisk ou famozu liu ho naran Linux Live USB. Aplikasaun cross-platform ne'e bele utilizadu iha variu sistema operasaun hanesan Linux, Windows no MacOS.

Ho UNetbootin ita bele kria Live USB ho diversu file ISO distro Linux hanesan Debian, Ubuntu, Linux Mint, OpenSUSE, Fedora, CentOS, no seluktan.

Notas:
Pratika ne'e Autores teste iha Linux Mint 7.3. File ISO Linux mak utilizadu Ubuntu versaun 16.04. Karik file ISO seidauk disponivel, bele download iha website http://www.distrowatch.com. La haluha mos USB Flashdisk ho kapasidade 2 Gigabyte nudar dispotivo bootable.

Lalaok instalasaun no utilizasaun hanesan tuir mai ne'e:
  1. Konekta Flashdisk ba port USB iha dispotivo komputador ou laptop

  2. Loke aplikasaun Terminal liu husi menu: System Tools → Terminal

  3. Kontinua instala pakote UNetbootin ho maneira:
    sudo apt-get install unetbootin
  4. Depois instalasaun pakote UNetbootin remata, loke aplikasaun refere liu husi menu:  System Tools → UNetbootin

  5. Hatama password sistema Linux.

    Konfirmasaun Password Sistema Linux
  6. Kuandu susesu hatama password sistema Linux, sei mosu janela aplikasaun UNetbootin hanesan ezemplu ilustrasaun tuir mai ne'e:

    Janela Aplikasaun UNetbootin
  7. Karik hakarak kria bootable flashdisk utiliza file ISO, hili "Diskimage" (1), desidi opsaun "ISO" (2), no klik ba butaun "Select disk image file" (3) (hare'e ezemplu ilustrasaun tuir mai).

    Maneira Determina File ISO Iha UNetbootin
  8. Buka no hili file ISO Linux mak antes ne'e prepara ona iha hard disk laran.

    Loke File ISO Iha UNetbootin
  9. Depois hili file ISO, kontinua ho determina opsaun Type ba USB Drive (1), no hili naran husi Drive flashdisk ne'ebe detekta iha sistema Linux (2) (hare'e ilustrasaun), no klik ba butaun "OK" (3).

    Determina Lokalizasaun Flashdisk Iha UNetbootin
  10. Prosesu extratu no kopia file ISO ba flashdisk sei mosu hanesan ezemplu ilustrasaun iha kraik ne'e.

    Janela Prosesu Transferensia File ISO Ba Flashdisk
  11. Kuandu mosu janela hanesan ilustrasaun tuir mai ne'e, signifika ita susesu ona kria Linux Live USB. Klik deit butaun "Exit" para bele sai husi aplikasaun UNetbootin.

    Janela Instalasaun Kompletu UNetbootin
Notas:
Karik kria ona Live USB utiliza aplikasaun UNetbootin, la presija ona uza CD/DVD kuandu hakarak instala sistema operasaun Linux. Alende ne'e mos, nudar solusaun bodik ba Komputador no Laptop mak la disponivel CD/DVD ROM ou dispotivo CD/DVD ROM avariadu hela.

To'o ne'e deit mata-dalan konaba UNetbootin husi Autores. Karik hakarak hatene liutan informasaun konaba aplikasaun UNetbootin, bele tama deit ba sitiu referensia iha kraik ne'e.

Obrigado!

Referensia: 
https://unetbootin.github.io/
https://sourceforge.net/projects/unetbootin/
https://en.wikipedia.org/wiki/UNetbootin

read more

Aprende Konaba Partisaun Iha GNU/Linux (Parte 1)

Eligio Moniz do Rego , , Monday, February 6, 2017
2

Konaba Partisaun
Partisaun hanesan maneira ida para hafahe espasu iha hard disk ho metodu logic no la'os ho metodu fiziku, hodi nune'e Ita bele edita no manipula partisaun husi kapasidade hard disk ne'ebe iha tuir nesesidade.

Vantajem husi partisaun:
  • Fasil para organiza dadus ou dokumentus, ezemplu bele hafahe partisaun ida ba sistema operasaun no partisaun seluk para rai dadus/dokumentus.
  • Halo seguru dadus ou dokumentus, ezemplu karik partisaun sistema falha, dadus ou dokumentus ne'ebe iha partisaun seluk nafatin seguru.
  • Bele instala sistema operasaun liu husi ida.
  • Hasa'e atuasaun tempu asesu ba hard disk ne'ebe lais liutan.
Tipu Partisaun Iha GNU/Linux
Bainhira atu kria partisaun iha hard disk, dahuluk presija hatene tiha lai tipu partisaun ne'ebe iha.
Partisaun iha hard disk fahe ba tipu tolu, ne'e maka Primary, Extended, no Logical.

Tuir mai esplikasaun badak husi tipu hirak ne'e:
  • Primary
    Tipu partisaun ne'e hanesan partisaun Primary iha hard disk, jeralmente bodik ba sistema operasaun. Kada hard disk ida bele kria maksimu partisaun Primary 4 deit karik la iha partisaun Extended, ou maksimu 3 partisaun Primary karik iha partisaun Extended.

  • Extended
    Tipu partisaun ne'e hanesan mos parte husi partisaun Primary no maksimu bele kria ida deit iha hardisk laran, utilizadu para akomoda partisaun Logical. Hanesan esplikasaun konaba tipu partisaun primary ne'ebe limitadu ho kuantidade 4 deit, bainhira atu kria partisaun ne'ebe barak, bele utiliza partisaun Extended.

  • Logical
    Partisaun ne'e bele kria karik iha ona partisaun Extended no utilizadu para rai dadus. La iha limitasaun kuantidade husi partisaun Logical, ne'e signifika iha hard disk ida bele kria partisaun Logical ho kuantidade depende husi nesesidade.
Oinsa Bele Hatene Tipu Partisaun Iha GNU/Linux?
Iha GNU/Linux Ita bele hatene partisaun Primary, Extended no Logical husi numeru ne'ebe iha hanesan ezemplu tuir mai:
  • Partisaun Primary
    komesa husi numeru 1 to'o 4

    Ezemplu:
    sda1, sda2, sda3, no sda4.

  • Partisaun Extended
    komesa husi numeru 1 to'o 4 depende husi kuantidade partisaun Primary ne'ebe iha.

    Ezemplu:
    Karik iha hard disk disponivel ona partisaun Primary 2, signifika partisaun Extended bele iha pozisaun sda3 ou sda4.

  • Partisaun Logical
    komesa husi numeru 5 ba leten.

    Ezemplu:
    sda5, sda6, no seluktan.

    • Hanesan ezemplu husi ilustrasaun iha kraik ne'e, sei esplika oinsa identifika tipu partisaun iha hard disk husi sistema GNU/Linux.
    Ezemplu  Ilustrasaun  Husi Tipu Partisaun Iha Hard disk (Linux)

    Ezemplu husi ilustrasaun iha leten signifika:

    - Partisaun Primary iha 3 (sda1, sda2 no sda3)
    - Partisaun Extended iha ida deit ne'ebe okupa sda4
    - Partisaun Logical iha 3 (sda5, sda6 no sda7)

    Notas:
    Geralmente sda hanesan hard disk Primary ne'ebe identifikadu iha sistema GNU/Linux. Karik disponivel hard disk 3 sei detekta sda, sdb, sdc no seluktan.
Komparasaun Tabela Partisaun Windows & GNU/Linux?
Iha sistema operasaun Windows, partisaun sei identifikadu ho tipu alfabetu la'os numeru hanesan iha GNU/Linux. Aliende ne'e mos, partisaun sei temi ho naran 'Drive'.

Tuir mai ezemplu ilustrasaun tabela partisaun iha sistema operasaun Windows:
 
Ezemplu Ilustrasaun Tabela Partisaun Ne'ebe Identifikadu Iha Windows

Ilustrasaun husi ezemplu iha leten signifika:

- Partisaun Primary iha 1 (drive C)
- Iha Windows partisaun Extended la definido ho alfabeto
- Partisaun Logical iha 3 (drive D, drive E no drive F)

Karik konvertidu ba tabela partisaun GNU/Linux hanesan tuir mai:

Ezemplu Ilustrasaun Tabela Partisaun Ne'ebe Identifikadu Iha GNU/Linux
- Partisaun Primary iha 1 (sda1)
- Partisaun Extended iha ida deit ne'ebe okupa sda2
- Partisaun Logical iha 3 (sda5, sda6 no sda7)

Alokasaun Partisaun Ba GNU/Linux
Kuandu hakarak halo alokasaun partisaun ba sistema operasaun Linux, presija komprende uluk deskrisaun jeral konaba tipu partisaun ne'ebe mensiona iha leten, hodi nune'e labele halakon dadus ou dokumentus.

Partisaun ne'ebe atu aloka ba instalasaun sistema operasaun Linux, minimu tenser iha partisaun mamuk rua:

1. partisaun / (root)
2. partisaun Swap

Notas:
/
Root hanesan partisaun prinsipal ba Linux, karik iha sistema operasaun Windows maka Drive C. Rekomendasaun kapasidade para instalasaun sistema Linux minimu 4GB.
Swap
Partisaun ne'ebe preparadu nudar Virtual Memory ba Linux, kuandu memoria komputador nakonu parsialmente prosesu serbisu sei desviadu ba partisaun swap. Kapasidade ba partisaun swap tenser 2X bo'ot husi RAM. Ezemplu memoria ou RAM komputador 512MB, kria swap sai 1GB. 

Ho partisaun rua ne'ebe iha leten, bele kompleta kriteriu minimu para instala sistema operasaun Linux.

Tuir mai ezemplu ilustrasaun husi tabela partisaun rua ne'ebe mensiona:

Ezemplu Ilustrasaun Kriteriu Minimu Partisaun Ba GNU/Linux
- sda1 no sda2 utiliza tipu partisaun Primary
- Partisaun sda1 ba Swap
- Partisaun sda2 ba / (root)

Aliende ne'e mos iha sistema operasaun Linux, diretorio ne'ebe maka disponivel iha partisaun root bele ita kria ketak tuir utilidade. Hanesan diretorio /home ho fungsaun para rai dadus ou dokumentus husi utilizador ne'ebe sei parte ida hamutuk ho partisaun root kuandu alokadu tuir kriteriu minimu. Maibe karik hakarak impede dadus ou dokumentus labele lakon bainhira akontese buat ne'ebe la espera, hanesan ezemplu halo re-instalasaun Linux, sujestaun husi Autores diak liu kria partisaun /home ketak husi partisaun prinsipal (/).

Notas:
/home
Equivalente ho diretorio "Documents & Settings" karik iha sistema operasaun Windows XP ou "Users" iha Windows 7 ba leten.

Ezemplu ilustrasaun husi alokasaun ketak partisaun /home hanesan iha kraik ne'e:

Ezemplu Ilustrasaun Partisaun /home ne'ebe ketak husi / (root)

Esplikasaun husi ezemplu ilustrasaun iha leten:

- sda1, sda2, sda3 utiliza tipu partisaun Primary
- Partisaun sda1 ba Swap
- Partisaun sda2 ba / (root)
- Partisaun sda3 ba /home

Kria Partisaun GNU/Linux Husi Hard Disk Ne'ebe Ezisti Ona Windows!
Ezemplu iha leten kuandu kondisaun kapasidade hard disk alokadu tomak ba GNU/Linux, maibe oinsa karik atu kria partisaun husi hard disk ne'ebe ezisti ona sistema operasaun Windows?

Resposta husi pergunta refere maka presija kria parsialmente kapasidade hard disk ne'ebe ezisti ona para bele alokadu ba GNU/Linux. Jeralmente komputador ho sistema operasaun Windows konsisti partisaun rua ne'ebe maka drive C no D. Karik partisaun husi D disponivel kapasidade hard disk ho espasu bo'ot, diak liu resize partisaun refere bodik ba GNU/Linux.

Tuir mai ezemplu ilustrasaun husi tabela partisaun Windows ne'ebe jeralmente disponivel iha komputador:

Ezemplu Ilustrasaun Tabela Partisaun Iha Windows Em Jeral

Depois resize partisaun D no kria fali partisaun foun para alokadu ba sistema operasaun GNU/Linux, tabela partisaun sei konvertidu sai hanesan ezemplu ilustrasaun iha kraik ne'e:

Ezemplu Ilustrasaun Resultadu Husi Resize Partisaun Windows

Esplikasaun husi ezemplu ilustrasaun iha leten:

- Partisaun sda1 ba C
- Partisaun sda2 ba Extended
- Partisaun sda5 ba D
- Partisaun sda6 ba Swap
- Partisaun sda7 ba / (root)

Karik hakarak aumenta partisaun /home, tabela partisaun sei sai hanesan tuir mai:

Ezemplu Ilustrasaun Resultadu Husi Aumenta Partisaun /home

- Partisaun sda1 ba C
- Partisaun sda2 ba Extended
- Partisaun sda5 ba D
- Partisaun sda6 ba Swap
- Partisaun sda7 ba / (root)
- Partisaun sda8 ba /home

Artiklu "Aprende Konaba Partisaun Iha GNU/Linux" parte dahuluk to'o iha ne'e deit, no sei iha kontinuasaun ba parte daruak.

Nafatin le'e weblog MataDalanLinux!

Referensia:
http://www.wikipedia.com
http://www.tldp.org
http://www.ibm.com

read more
Subscribe to: Posts (Atom)